ឯកឧត្តមឧកញ៉ា អូស្មាន ហាស្សាន់ អញ្ជើញសំណេះសំណាល និងពិសារអាហារសាមគ្គីជាមួយបុគ្គលិកសាងសង់ ផ្សារទំនើបធំជាងគេនៅកម្ពុជា

ភ្នំពេញ៖ នៅឯការដ្ឋានសាងសង់ផ្សារទំនើប «ភ្នំពេញមេហ្គាម៉ល» នៅល្ងាចថ្ងៃទី២៤ ខែកញ្ញា ឆ្នាំ២០១៦ នេះ បានរៀបចំពិធីសំណេះសំណាល និងពិសារអាហាសាមគ្គី ជាមួយបុគ្គលិកសាងសង់របស់ខ្លួន ប្រមាណ ៦០០នាក់។ ពិធីនេះ មានកាអញ្ជើញចូលរួមជាអធិបតី ពីសំណាក់ ឯកឧត្តមឧកញ៉ា អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងការងារ និង បណ្តុះបណ្តាលវិជ្ជាជីវៈផងដែរ។

ផ្សារទំនើបដែលមានផ្ទៃសរុបជាង ១៥០,០០០ ម៉ែត្រការ៉េ កំពស់ ៩ ជាន់ និង ២ ជាន់ក្រោមដីនេះ កំពុងសាងសាង់ បានប្រមាណ ៨០% ស្ថិតតាមបណ្តោយមហាវិថីសហព័ន្ធរុស្ស៊ី កែងផ្លូវវត្តនាគវ័ន គ្រោងនឹងបញ្ចប់ការសាងសង់នៅដើមឆ្នាំ២០១៧ ដែលនឹងក្លាយជាផ្សារទំនើបធំជាងគេនៅកម្ពុជា។ ហើយក្រុមហ៊ុន នឹងបន្តសាងសង់សណ្ឋាគារមួយ ពីលើផ្សារទំនើបនេះបន្ថែមទៀត ដែលមានផ្ទៃជាង ៥២,000 ម៉េត្រការ៉េ កំពស់១៣ជាន់ មានជាង ៤០០ បន្ទប់។

មានមតិសំណេះសំណាលនាឱកាសនោះ ឯកឧត្តមឧកញ៉ា អូស្មាន ហាស្សាន់ បានមានប្រសាសន៍ថា អាគារដ៏ធំមហិមានេះ អាចផុសចេញជារូបរាងឡើងបាន ក៏ដោយសារប្រទេសយើងមានសុខសន្តិភាព មានអ្នកវិនិយោគ ហើយសិស្សានុសិស្សមានឱកាសរៀនសូត្របានខ្ពស់ខ្ពស់ រហូតក្លាយជាវិស្វករ អ្នកបច្ចេកទេស ដែលមានសមត្ថភាពខ្ពស់ក្នុងការសាងសង់។ ហើយក៏ដោយសារមានការចូលរួមសហការគ្នាបានល្អពីគ្រប់ជាន់ថ្នាក់ តាំងពីថ្នាក់ដឹកនាំ អ្នកបច្ចេកទេស រហូតដល់ថ្នាក់កម្មករ។

ឯកឧត្តម ក៏បានបង្ហាញពីអារម្មណ៍សប្បាយរីករាយ និងមានមោទនៈភាពក្រៃលែង ដោយបានដឹងថា អាគារនេះ សាងសង់ឡើងដោយស្នាដៃកូនខ្មែរ ដែលវាមានលក្ខណៈទំនើប ពោរពេញដោយបច្ចេកទេស និងមានភាពរឹងមាំ ខណៈដែលមជ្ឍដ្ឋានមួយចំនួន គិតថា ជាស្នាដៃពីបរទេស។ នេះសបញ្ជាក់ថា កម្រិតនេះការយល់ដឹងរបស់កូនខ្មែរយើង ពីមួយថ្ងៃទៅមួយថ្ងៃ ចេះតែមានការកើនឡើងជាលំដាប់។

ឯកឧត្តមរដ្ឋមន្ត្រីប្រតិភូ បានមានសង្ឃឹមយ៉ាងមុតមាំថា បន្ទាប់ពីផ្សារទំនើបនេះដំណើរការនៅឆ្នាំក្រោយ នឹងចូលរួមចំណែកកាត់បន្ថយភាពក្រីក្របានមួយកម្រិត ដោយនឹងអាចស្រូបទាញកម្លាំងពលកម្មបានជាង ៣០០០នាក់ ឯណោះ ដើម្បីចូលធ្វើការងារតាមផ្នែកផ្សេងៗ។

ផ្សារ​ទំនើប «ភ្នំពេញមេហ្គាម៉ល»នឹង​មាន​សេវាកម្ម​ចម្រុះ​ជា​ច្រើន​ដូច​ជា កន្លែង​លក់​សម្លៀក​បំពាក់ ភោជនីយ​ដ្ឋាន រោង​ភាពយន្ត កន្លែង​ក្មេង​លេង ខារ៉ាអូខេ កន្លែង​ហាត់​ប្រាណ ស្ទីម សូណា ហាង​លក់​សៀវភៅ ឱសថ​ស្ថាន និង​សេវាកម្ម​ចម្រុះ​ជា​ច្រើន​ទៀត ជា​ពិសេស​មាន Department Store ទំហំ ១០ ០០០ ម៉ែត្រ​ការ៉េ ដែល​ជា​ហាង​ស្នូល​របស់ PARKSON ក្នុង​ផ្សារ​ទំនើប​នេះ​តែ​ម្តង។